【銅鑼灣】好多人話𠵱家做歌手搵唔到食，好似連詩雅（Shiga）喺今年樂壇成績都算唔錯，憑《說一句》上到「叱咤十大」第九位，仲攞埋「香港2013年度YouTube華語歌曲影片排行榜」NO.1，可惜表面風光，但實際收入似乎難成正比。前日傍晚6點半，記者發現Shiga一個人喺銅鑼灣時代廣場附近行街，一頭金髮配襯黑色中褸同超長boots，雖然打扮有啲MK，但高䠷身形加上長腿，仍然吸引唔少途人注視。
狂𥄫師奶套裝
Shiga邊行邊玩微信，佢之前講過自己係師奶仔一名，最鍾意執平貨，當晚見佢對周邊嘅名牌舖頭冇乜興趣，反而行咗入渣甸坊嘅地攤檔，經過見到賣98蚊嘅師奶套裝都唔放過，駐足望咗幾眼，但睇咗幾個賣打底衫褲嘅小檔都冇收穫，最後去咗一檔專賣胸圍同內褲嘅檔口。
Shiga似係熟客仔，同老闆娘好啱傾，不停介紹新貨畀佢，但Shiga對艷紅同可愛粉紅lace內褲都睇唔上眼，反而鍾意全黑胸圍款，由於街邊冇得試身，佢惟有用手摸摸質感，結果一口氣買咗兩個bra，估計埋單只係百幾蚊，真係好抵！買完bra，Shiga攞住戰利品再行返去路邊舖頭睇首飾同衫，但揀唔啱心水就離開。
採訪、攝影：吳耀輝、潘冠恩
戲裡戲外，話題最強，立即收睇《動戲場》:
http://hk.movies.nextmedia.com/extra/list/