睇住韋斯咸最近兩場失咗11球之後（未計昨晚對卡迪夫城戰果），我發現自己青春咗，因為腦裏面出現咗一個好耐冇出現嘅問號，唔係點解會輸咁多，亦唔係有冇打假波，而係點解好哋哋一個球迷會喊到收唔到聲嘅呢？
其實輸畀曼城6球呢場真係冇乜嘢，又唔係第一隊作客俾曼城數6球，不過對森林都俾人數5球呢，就真係有啲估你唔到。出場嘅時候見到陣中有好幾個首次上陣嘅新丁時，我仲有一絲驚喜㖭；所以當輸到第3粒時，我竟然冇癮到行埋電視機面前，爆咗句粗就想熄機，但喺呢個時候，我見到觀眾席有位小朋友，喺爸爸嘅擁抱之下突然爆喊，我俾佢呢個動作嚇親，火速攞手機影低呢個「珍貴鏡頭」之後，都係熄咗電視；但嗰一刻真係有啲諗極唔明，乜輸波係要喊㗎咩？係呢位小朋友過份熱血，定係我呢啲老餅球迷已經變成冷血動物呢？
極速諗番自己為咗個波付出過啲乜：時間、心機、金錢、一隻牙甚至一條韌帶，偏偏由細到大，真係好似未試過因為足球而喊過，冇，一滴都冇！咁你又唔好以為男人老狗不嬲都唔會「流馬尿」㗎啦，錯！人越大其實越易喊！睇一首陳綺貞嘅MV，甚至一段《新聞透視》嘅故事都會搞到眼濕濕，眼淺過少年時代好多，咁點解睇波又唔會喊呢？我仲係諗唔明。
4年前嘅世界盃，喺開普敦目睹阿根廷慘吞4蛋即場暴斃，我難過兼難堪，唯一可以做嘅只係一言不發，但係我隔籬嗰位半途出家嘅女球迷卻因為咁而爆喊，係爆嗰隻，有聲又有畫嘅正宗聲淚俱下，如果當時馬勒當拿見到佢梨花帶雨個樣，可能會羞愧至死。
你呢？你有冇為足球而喊過？前排韋斯咸前鋒邁加入波之後眼濕濕，原因係佢成年冇入過波，應該係受咗唔少委屈，眼淚係為佢自己而流嘅。咦，咁我又有啲明嘞，可能小球迷喊，係因為覺得自己愛隊輸波，所以會好冇face俾人笑啦。小朋友唔使怕，喺俾人笑之前，先搵人嚟鬧咗先，一係鬧領隊，一係鬧球證，咁你就會舒服晒！放心鬧啦，球場上個個都係咁做，唔係點平衡心理呀。
KEYMAN
now TV主持
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24