兩個救火的少年，郭子健、余文樂15年前初出茅廬，拍了一套叫《青苔》的電影，今日都已經是老江湖。余文樂由當年開日本車仔，進展到擁有多部歐美名車。郭子健跟周星馳合作導演完《西遊．降魔篇》，身心經過歷練，戲內戲外都取經完畢。兩人走在一起余文樂依然是導演口中的「仆街仔」，絕對沒有不敬之意，只是帶出兩人依然都有當初的救火心，都是本着「唔打就唔會輸，要打就一定要贏」的打擂台心態，順理成章拍了這套救火戲。
採訪：何永寧
現正上映
好奇害死貓，成見害死人，先入為主以為執導拍了歷來華語片第二最賣座的電影《西遊．降魔篇》之後，導演郭子健會跟以往不同，不過故事發展又不是這樣，他說：「冇唔同，我同余文樂大家都係當年咁嘅仆街仔，都係咁鍾意電影，鍾意睇漫畫，有嗰句講嗰句。」真要找不同就只能說余文樂拍了很成功的《志明與春嬌》及《春嬌與志明》，郭子健就夥拍周星馳合作導演了《西遊》，電影講唐三藏取經，現實中郭子健亦在電影中取了很珍貴的一次經：「同周星馳合作真係好好嘅經歷，每日個人就係俾佢榨乾榨淨，到第二日又嚟榨過。到片場第一件事，周星馳會問你：『你今日想點拍？點解要咁拍？』問到你都有啲驚。其實你哋唔好睇到佢好似洪水猛獸咁、又或者好似暴君咁，佢愛電影嘅程度，你唔同佢合作過係估唔到，佢亦唔係外間所講咁專制，好多時係因為佢太鍾意電影同太聰明。至少我今次拍《救火英雄》，有好多係同周星馳合作時學到嘅嘢可以活學活用。」每日到片場為《救火》開工，他都會反複問演員及攝影師副導：「你哋點解要咁拍、咁演」，反複中找到一條最好的表達方式，他笑說：「咁我會問得有技巧好多。」
新聞讀白作隱喻
不約而同救火的題材先後被拍成電影，郭子健笑言是美麗的巧合：「你要數最早應該係杜琪峯97年套《十萬火急》，嗰套當然經典，喺當時冇咁流行CG電腦特技，可以拍到咁嘅效果梗係犀利，不過都成16年。近期套《逃出生天》我只可以講係巧合。我原先嘅構思係拍香港大停電，慢慢至將個劇本修改成救火片。」他表示：「戲中講到嘅天然氣管爆炸導致發電廠失火，香港電網癱瘓引起全港停電係有可能，我問過專家佢話有可能，當然要有好多咁啱得咁蹺嘅巧合因素。」拍電影《打擂台》時有句金句「唔打就唔會輸， 要打就一定要贏」，亦成了他拍電影的座右銘，他說：「到處都係擂台，擂台只係一個名，最緊要係贏自己，今次要贏嘅就係點樣可以拍到同以往救火片唔同，所以今次講嘅係煙，人定勝煙係想講人唔好喺煙入面迷失自己，戲裏面都係想帶出呢個訊息。」至於結尾的一段新聞讀白形容「香港面臨史無前例的災難，香港市民卻能從容面對」，他承認是加入了隱喻，他說：「都係嗰句唔打唔會輸，想表達係只要敢面對，香港乜嘢難關都過到嘅。」
辛苦過真消防員
至於余文樂，他於《救火英雄》中為郭子健奉獻了兩個第一次，分別是首次飾演消防員及首次於戲中飾演父親角色。雖然樂仔於片中的消防員造型入型入格，但他不諱言其實對消防員這工作沒甚麼憧憬，他笑言：「我身邊好多朋友都做消防，所以對我嚟講呢個工作神秘感唔算大，但係我由入行開始到𠵱家做過N次警察，所以突然要做消防員都幾有新鮮感。」他又謂拍攝前的體能訓練以及密集式拍攝雖然辛苦，但也令他不經不覺間接得益，把身形操得甚「弗」，他說：「我哋成班都成日講笑咁話我哋可能辛苦過啲真正消防員，消防員都未必日日入火場，但我哋日日都拍救火戲，真係幾甘㗎！」
講到同戲入面飾演阿樂囝囝嘅小演員合作嘅情況時，他好像把戲內的父愛帶了出來，笑得勁冧地表示：「嗰個𡃁仔好醒，雖然有時小朋友狀態唔穩定，不過唔好話小朋友，我哋都會有狀態唔好嘅時候啦，所以佢做得好好㗎喇，我同佢戲內外都係咁溝通成日互窒，有時都會俾佢話番我轉頭：『老竇呀，唔係咁演呀！』。」樂仔坦言這個父親角色若是出現在數年之前，他未必有信心駕馭得來。他表示：「我以前可以一年拍六部戲，呢一、兩年都係每年拍一部、兩部，可以追求質素而唔係數量，都算係成長啩！」
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24