中國金融投資（605）有祖國龐大嘅信貸需求，加埋有強勢夥伴，生意長賺長有。中金投嘅PE得4倍單位數，又係有博翻一番嘅潛質。
中金投係北京最大規模嘅中小企信貸企業，亦都啱啱喺上年中，拍住祖國最大嘅第三方財富管理機構諾亞，合作做祖國正係全力推動緊嘅資產證券化產品。中金投嘅股東當中，又包括建行（939），講實力，講股東及夥伴，中金投彈出嚟。
據雜誌報道，單係中金投主打嘅北京地區，每年講緊嘅融資，有成3,000億銀人仔。而中金投嘅計劃目標，係喺明年底之前，達到50億銀人仔以上，數額係中金投上年信貸規模15億銀人仔嘅三倍！
預測PE得4倍
中金投有實力夥伴做後盾，加埋主打地區北京，信貸需求已經咁勁，要達到呢個目標，真係易過借火，中金投肥仔水。而講求信貸業務增長嘅同時，中金投所有貸款，都係需要借貸人抵押，風險幾乎降到最低。
中金投喺2013年上半年度，純利上到去1.2億銀，增長咗38%。只係係咁意計數，當2013全年及本年度純利增長，只係keep住呢個幅度，去到3.5億及4.8億銀，中金投預期PE得番5.3倍及4倍。相對同行信達（1359）14倍及遠東宏信（3360）10倍，又係平一大截。
又股東建行，係以兌換中金投CB入股，每股兌換價係0.5元，中金投由11月0.85元到家陣，調整咗近30%，現價（0.61元）唔係高出建行嘅入股價好多。而中金投嘅大股東兼主席張小林等，揸咗中金投近63%股權，一股都冇甩過，信心爆棚。
博中金投追番上遠東宏信10倍PE水位，講緊要翻一番，但係明年度嘅PE，仲係喺單位數。
錢雋
細價股專家
本欄逢周二、五刊出
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24