【動Fun】正所謂「此處不留人，自有留人處」，呢個道理相信好多藝人都會明白，事關近年有好多喺香港無乜發展嘅藝人，都會北上博一博，希望闖一番新世界咁話。
要數當中最能變得成摩托嘅藝人呢，呢三位一定有份。
劉愷威
之前喺無綫一直鬱鬱不得志，相信大家最有印象嘅，都係佢係《真情》入面飾演「安仔」呢個角色喇。但佢一上到大陸，即刻嚟個「安仔大翻身」，成為內地炙手可熱嘅一線小生之外，劇酬更暴升２０倍，仲風光到殺返TVB，拍住視帝黎耀祥做男主角𠻹。
𠵱家真係要由改口叫「安哥」先得喇。
陳鍵鋒
當年因為同無綫「傾唔掂數」，憤而轉戰大陸，憑內地劇《美人心計》廣為人知，上年演出嘅《烽火佳人》更創下安徽衛視2013年最高收視紀錄，鋒鋒今次真係吐氣揚眉喇。
葉璇
同期出道嘅佢就仲叻叻，喺TVB拍嚟拍去都係嗰啲角色，一返大陸，自己做埋製作人，仲搵埋林峯嚟同自己拍住上，就連TVB都要買返嚟播。
想知更多新奇趣聞，記得留意【動Fun】
http://hk.apple.nextmedia.com/livestream/channel/actionfun