多謝收費電視嘅自選電影台，令小弟不時可以重溫港產片經典之作；最近此台又有王大導大作《阿飛正傳》，猶記得此片喺90年聖誕節附近上映，還是初中生嘅我，同一大班同學買票入場，只因為張國榮、劉德華等巨星名字，結果差唔多瞓住捱完此片。但當人大了，先知道「一分鐘朋友」、「無腳的雀仔」，係多麼具深度嘅對白。
一套電影悶定唔悶，要先睇你嘅前設主觀願望，正如西甲悶唔悶，也視乎你點看待足球；無可否認，高度貧富懸殊嘅西甲，巴塞隆拿與皇家馬德里已壟斷咗大部份資源，今季勉強有馬德里體育會加入戰團，否則冠軍都係巴塞與皇馬單打獨鬥。睇巴塞比賽，基本上巴塞贏3:0定輸0:3，踢法都唔會變化， 大多數鏡頭都係巴塞圍住對手後半場傳波。球迷批評巴塞悶，但係咁悶又場場吸引近十萬主場球迷睇波，你真係以為傳嚟傳去好容易？不如你試吓畀莫耶斯領軍嘅曼聯，喺對手壓迫下可唔可以傳10次唔斷纜。
唔識欣賞傳波？轉睇皇馬啦，皇馬集合世界兩位最貴價翼鋒，打出集速度與技巧一身嘅攻擊線；你以為其他西甲球隊冇看點？當了解到大衛施華、米捷等，由西甲嚟到英超後呼風喚雨，就知道西甲平常球員，都勝過英超所謂星級戰將。文：牽牛
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24