港台「第36屆十大中文金曲頒獎音樂會」後日喺九龍灣展貿Star Hall舉行，馮仁昭收到風，呢份2013年度樂壇第三張成績表，繼續由陳奕迅（Eason）同容祖兒玩晒，佢哋唔只齊齊做男女歌手大贏家，Eason仲成為最優秀流行男歌手九連霸，祖兒就係最優秀流行女歌手十連霸，雙雙創造歷史紀錄。
兩代歌神爭崩頭
馮仁昭聽聞Eason除咗攞最優秀男歌手外，仲擸埋優秀流行歌手、全球華人至尊金曲同金曲獎，至少會橫掃4獎，而全年最高銷量男歌手獎就係Eason同張學友之爭，兩位歌神嘅唱片銷量叮噹馬頭，未知鹿死誰手！而祖兒同Eason一樣咁巴閉，攞嘅獎差唔多，祖兒同樣攞埋優秀流行歌手、金曲獎同銷量女歌手獎，起碼有4獎在手。
據知十首金曲分別有：Eason、祖兒、李克勤、薛凱琪、王菀之、梁漢文、鄭融、許廷鏗、周柏豪等，張智霖嘅《歲月如歌》亦有機打入十首金曲；而謝安琪、G.E.M.就攞優秀流行國語歌曲，最有前途新人獎就係張惠雅（Regen）、AGA同J.Arie。
撰文：馮仁昭
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24