勇士近排弗到漏油，不過遇上由「不打呔的男人」傑特（小圖）領軍嘅網隊一樣冇運行。周三NBA常規賽網隊喺主場以102:98險勝勇士終止對手10連勝強勢，傑特近4場都冇打呔，結果全部贏晒，帶領隊波終於打入東岸前8名。咁老利，網隊周六主場對東岸勁旅熱火（now635台明日9:00am直播），傑特唔係仲打呔嘛？
終止勇士客途全勝
勇士近況大勇，如果佢哋喺今場波贏到網隊，唔單止連贏11場，仲會成為歷來第一支球隊可以喺連續7場作客之旅贏晒嘅球隊，不過最後都冇辦法達成偉業。呢場波雙方都打得幾緊湊，第一節勇士領先網隊10分，但到半場主隊又以7分反超前。勇士主將史堤芬居里今仗好活躍，全場25射11中入34分，不過3分球只係10射2中，包括完場前5秒落後兩分嗰陣遠射失手，導致勇士輸波。
網隊射手祖莊遜攻入全隊最高嘅27分，老將加尼特貢獻13分。踏入2014年之後網隊至今4戰全勝，繼續刷新今季連勝紀錄，由爆冷作客贏咗西岸勁旅雷霆開始，教練傑特就已經冇打領呔，迷信又好心理影響又好，既然順開就冇理由又打返呔。傑特喺賽後話：「今場波我哋由防守到進攻都打得好好，自從贏咗雷霆之後，我哋就一直打得好好，有團結精神。」網隊喺聽朝主場對熱火，除咗有直播之外，兩隊波亦會着上花名球衣比賽。
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24