【銅鑼灣】大劉劉鑾雄紅顏知己甘比同人妻應采兒做咗媽咪之後，變得仔女大過天，大前日佢哋齊齊做廿四孝媽咪，分別帶心肝寶貝行銅鑼灣。甘比大前日帶住囡囡劉秀樺行利園嘅童裝層，傍晚6點幾兩母女喺兩個保鑣護送下濕平，同行仲有個女人，當時甘比同囡囡喺店內揀羽絨，保鑣就企門口做門神，發現記者喺店外拍攝時，保鑣好緊張咁通知甘比，佢望一望記者，然後繼續揀衫，最後連掃四、五件羽絨滿載而歸。
孭囝囝似師奶
而下晝2點半，瘦蜢蜢嘅應采兒唔用嬰兒車，親自孭住半歲大嘅囝囝Jasper現身恒隆中心，原來佢約咗梁烈唯老婆Tina行家品店。戴眼鏡紮起頭髮嘅應采兒打扮普通，孭住囝囝嘅佢完全係入型入格師奶look，當時Jasper瞓緊覺，應采兒邊濕平邊望吓囝囝醒未，果然係細心媽咪，冇幾耐梁烈唯老婆買咗垃圾桶、紙巾盒、圍裙等，之後佢哋就轉去買咖啡，離開商場過馬路時，咁啱前面有個男途人食煙，應采兒怕囝囝吸入二手煙，即停步畀男人先行，仲睥咗對方一眼，然後上車離開。
採訪、攝影：梁繼光
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24