有名叫做吳得掂，教育局局長吳克儉有幾掂，大家有目共睹；尤其喺教育界內，吳得掂更加唔係浪得虛名，最近教協一個調查，要教師為吳得掂評分，近五成只係畀少少面佢咁象徵式畀1分，八成更「肥佬」咗佢；就算係常秘謝凌潔貞，亦有過半畀佢唔合格；呢對教育局孖寶馬年似乎要轉吓運。
常秘明哲保身難評分
教協呢個調查喺上年11月12至21號進行，訪問咗555位會員，仲邀請教師為吳得掂評分，1分表示最唔滿意，5分就係最滿意，結果有48%受訪教師畀咗1分，連同畀2分嘅32%，總共有八成教師認為吳得掂工作表現唔掂；話滿意嘅，即係畀4分或5分嘅只有3%咋！其中又以中學教師不滿度最大，有84%畀1或2分。
常秘謝凌潔貞亦冇功高震主，過半教師都話唔滿意佢，26%畀1分，29%畀2分，傾向滿意嘅只有6%；有兩成教師就話冇意見，可能因為部份教師對呢位官員認識唔多。原來有啲教師話喎，相對吳得掂同前任常秘，謝凌潔貞較為「明哲保身」，較少喺公開場合講解政府政策，所以好難畀評價。至於教育局整體評分，七成教師話唔滿意，只係畀1分同2分，話滿意肯畀4分或5分嘅只有4%。
教協話教育局受教育界「壓倒性不滿」，源於局方漠視前線工作者意見，怕且教育局孖寶，馬年都要搵方法轉吓運，或者，推副局長楊潤雄出嚟墊底。
李八方
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange