一個聯賽悶唔悶，其實係好主觀嘅，小弟覺得悶，係因為由細到大都睇英超，慣咗快上快落同埋激烈嘅身體對抗性，所以一睇西甲，就覺得好鬼慢。同埋，恕我膚淺，邊隊波多朋友講、多報紙寫、成日喺電視見到，就自然想去睇，同埋覺得好睇。
小弟反思自己係幾時覺得西甲悶呢？問題嘅核心嚟嘞，一個聯賽悶唔悶，並唔係單單講緊比賽，係包括聯賽文化同埋傳媒嘅配合，因為呢啲會影響球迷嘅感官。喺傳播學好似有個理論，現實係啲咩唔重要，最緊要係傳媒講啲咩，傳媒嘅取態係直接影響接收者對嗰樣嘢嘅睇法。
作為一個喺香港成長球迷，細細個就睇香港報紙同電視大，佢哋內容好多都係講英國自然就會對英超有種親切感。至於西甲呢？以前真係揭到入內版都係得細細格。
呢種情況喺今日都好常見，因為英超球迷多，英超新聞同賽果受歡迎，由市場角度去理解，自然繼續重視英超多過西甲，結果英超好睇過西甲呢個概念就不斷循環地加強。再者，西班牙同我哋語言不通，香港人普遍唔識西班牙文，自然錯過好多西甲有趣資訊。覺得西甲悶，係文化差異同傳媒習慣的影響吧。文：咖喱
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24