有「深圳李嘉誠」之稱嘅黃楚標生意瓣數多，舊年在港接手數碼電台DBC做大股東後，新近喺深圳大本營又有新搞作。佢原先經營開貨運航空公司──東海航空，上月攞到牌，準備下月做埋民航服務，成為第二間以深圳為基地嘅客運航空公司，黃楚標似乎想做埋航空業巨子。
先攻內地 後拓東南亞
黃楚標大約十年前，已經喺深圳以中外合資方式，成立一間叫「東海航空」嘅貨運航空公司，但直到2006年，先正式喺深圳機場開始做貨運生意；除咗飛國內線，亦飛孟加拉、柬埔寨同寮國國際線，𠵱家有七隻貨機。2010年又投資成立東海公務機公司，有六架私人飛機。
東海上月攞到內地嘅客運經營許可證，打算做埋客運。據總裁蘇國新所講，未來五年將引入25架波音737飛機，仲請咗百幾名機師，2月就有得衝上雲霄，暫時主要飛內地線，將來會開拓東南亞航線。
華華曾打電話上深圳向東海集團查詢詳情，可惜直至截稿時間都未有回音。
目前以深圳為基地又最強嘅係深圳航空，阿媽係背景與實力都相當雄厚嘅中國國航（753），黃楚標要挑戰呢個對手應該唔係話咁易。
港人之所以比較認識黃楚標，除咗係佢投資DBC，最主要係前特首曾蔭權之前被人踢爆，平租黃楚標旗下深圳東海花園6,000呎複式單位。唔知曾蔭權遲吓會否北上深圳幫襯東海航空呢？
李華華
mailto:[email protected]
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24