手遊股炒到飛沙劈石，IGG（8002）兩日喪升七成，博雅（434）搶高四成，收費平台股如神州數字（8255）、環亞智富（1390）亦連環破頂。同資深戰友吹水，佢話呢一浪絕對拍得住千禧科網潮嘅盛世，但而家嘅科網股全部有盈利，炒起上嚟其實可以更癲！
科網瘋潮再度升溫，全因阿里巴巴宣佈染指手遊平台，馬雲唔嫁又嫁，證明呢隻會生金蛋嘅鵝，將會越養越肥。阿里巴巴上月宣佈與軟件股金蝶（268）合作，推出針對內地電子商務企業嘅財務管理軟件，消息令金蝶股價持續攀升，如今阿里巴巴瞓身搞手遊，一定需要協助，如果金蝶轉型搞埋呢瓣，爆炸力肯定大到你唔信！
雖然上述想法只屬吹水性質，但炒股最需要嘅，其實就係幻想空間。不過，就算講實際業務，金蝶亦一啲都唔失禮。主打企業管理軟件嘅金蝶，連續9年成為內地中小企應用軟件市場一哥，龍頭地位穩如泰山，但未安於現狀，近年染指雲端業務搞得有聲有色，旗下雲之家企業用戶已突破50萬家，並正式推出收費版本，連萬科同海爾（1169）都係佢嘅客，有如此生招牌，要吸客真係易過借火！
睇圖表，金蝶經過早前一輪急升後，正於高位整固，一旦完成造旗，又會啟動新升浪，配合扭虧為盈嘅靚仔業績，值博率極高。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange