美國聯儲局副主席耶倫，上周終於獲得國會通過接替伯南克做下屆主席，雖然贊成票係歷來最少，履新後俾班國會議員抽秤就預咗，幸好儲局有獨立運作嘅金鐘罩，加上退市程序已啟動，只要經濟及通脹唔出亂子，國會班大帝除咗間中嘈吓，應該唔會惡出樣。
投資者今年態度轉趨審慎，美股至今未能再創新高，但三大指數跌幅少於1%，歐股情況類同，新興市場就相形見絀，因市場擔心儲局收水帶來走資壓力，高盛及大摩等大行近期亦相繼唱淡，睇怕短期都難有運行。
儲局退市嘅基調下，美元兌各主要貨幣今年表現偏強，受通縮陰霾拖累，歐元本周曾跌至1.3553美元，創一個月低位，日圓及澳元繼續係近期低位徘徊，本欄近月一直推介嘅紐元就繼續神勇，兌美元累升0.6%，是少數有得升嘅主要貨幣，紐元兌澳元交叉盤昨日更升至0.9312，續創五年新高。
英國自從獲得楓葉國央行前行長卡尼出任央行行長後，英國經濟過去半年表現的確唔錯，英鎊當然亦水漲船高，今年已升至1.66美元嘅兩年新高，近期仍貼近1.65美元。相反，接佢棒做加拿大央行行長波洛滋運氣就麻麻，自從佢去年10月突然撤回加息暗示後，加元走勢未好過，早兩日失守1.0738嘅重要支持位後，噚日仲跌至1.0846兌1美元嘅三年半新低，兌港元跌至7.1494。
該國本周數據顯示，當地去年11月貿赤出乎意料增至9.4億加元，雖然銀碼唔算多，但規模較市場估計多8倍，加上11月消費物價按年僅升0.9%，同2%嘅官方目標相差成條街，令外界擔心加拿大今年可能真係要減息應對。
兌美元勢試1.1算
自2010年10月以來，加拿大央行就一直維持利率於1厘，息口上較歐美日嘅近零息具有優勢，係近年吸引投資者嘅賣點。但好景不常，自央行舊年10月突然撤回傾向加息嘅立場，加上聯儲局退市因素，加元就開始失勢，由10月時的1.02兌1美元逐步向下，而家已跌到1.08，假如短期內守唔住1.0853嘅近四年低位，後市恐下試1.0991甚至1.1加元，即每加元兌港元下試7算。
儲局會議紀錄周三已出爐，會議紀錄除咗話擔心量寬效力減退外，其他內容大致上同會後聲明相若，簡言之，理事支持有秩序縮減買債，即使失業率降至6.5%嘅加息門檻，低息環境會玩多一排，退市沒有預設時間表，主要由經濟數據主導。
雖然儲局估計明年開始加息，但從美債與通脹掛鈎債券市場顯示，美國通脹預期已升至八個月高位，顯示市場開始擔心通脹會跟隨經濟向上，利好美元後市。縱使美元兌日圓短期內有機會調整，中線上升趨勢持續，上半年有望上試110；紐元兌澳元交叉盤繼續看好；加元若失守1.1兌1美元，可能出現新一輪跌勢。
奇兵
本欄逢周五刊登
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24