本報不時會進行散戶調查，每當問到散戶最看好嘅板塊時，結果永遠都係中資金融股跑出，內銀內險股近期表現不濟，股民依然難捨難離，從另一個角度睇，即係蟹貨多到冇朋友，齋秤呢個因素，中資金融股都唔值得再有憧憬。
有睇開本欄嘅戰友，不難發覺近排推介都熟口熟面，來來去去都係環保、科網、濠賭等板塊。無他，今年開局個股走勢更加兩極化，強股炒到飛天，弱股弱過藥煲，指數則繼續炒上落。老老實實，一兩款武器已經夠贏，又何用出動「攞你命三千」呢？
噚日推介環保股信義光能（968），埋單進賬半成，後市一旦突破高位1.84元，走勢肯定海闊天空，有貨嘅戰友可以繼續睇實。
今日推介金界控股（3918），又係蓄勢破頂mode。金界主要喺柬埔寨經營賭場NagaWorld，現價市盈率廿倍唔夠，比起濠賭股平均36倍，差唔多半價大平賣，點解咁抵？可能大家覺得金界只得柬埔寨一個地盤，唔夠爆炸力，但其實集團已經宣佈落戶俄羅斯，更有意進軍泰國、緬甸及越南等地，一旦全部落實，re-rate空間大到不得了，加上有四厘息打底，防守力一流。濠賭股日日破頂，金界只要衝穿8.2元阻力，肯定一去絕塵！
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange