【維基開台倒數173日】王維基揸弗的香港電視去年申請免費電視牌照失敗，最終另覓出路，上月底宣佈港視收購中移動的流動電視牌照，決定今年7.1開台，港視台前幕後非常振奮，上下一心群策群力，電視大戰一觸即發。可是向來霸權獨大的無綫前晚卻宣佈今年7月6日正式終止租出六個發射站予中移動子公司使用，時間上撞正港視開台。港視藝人艾威、郭鋒和林嘉華昨日異口同聲炮轟無綫行為，他們表示無論遇到甚麼阻滯，仍深信老闆王維基會逐一解決。
信王維基會成功
對於無綫突然終止發射站合約，此舉擺明衝着港視開台而來，林嘉華不屑無綫此舉，他昨反問：「點解佢哋有呢個行為，其實𠵱家到咗呢個地步，大家有競爭先會有進步。大家真正上擂台先可以進行比武，唔係贏同輸，如果要咁做，請問佢又贏到啲乜呢？」雖然港視面對波折重重，但林嘉華仍撐老闆王維基說：「我相信只要有信心，唔放棄，緊守信念先有動力，最終就會成功。」
郭鋒昨日在電話說：「六叔（邵逸夫）走咗，𠵱家都唔係以前TVB，佢哋都係怕損害自己利益先做呢啲嘢，我相信香港係有法治精神，電視廣播有限公司真係變咗有限公司。」郭鋒認為行業百花齊放，才可讓演員的表現發揮出來，他揶揄：「大家睇吓郭晉安拍嘅內地劇同港劇比較，佢拍內地劇表現直情係影帝，香港係膠劇，製作好影響藝人表現。」
問到艾威可覺無綫刻意阻撓，他昨說：「一定係，無綫有需要改變自己，時代已轉變，唔似以前同行如敵國，開多一間就搞到咁，局住佢哋要有所改變，以佢哋條件比我哋優勝，有競爭先有進步，將香港整體電視質素提高，有望贏番亞洲巿場地位，唔應該香港人打自己人，咁做係本末倒置。」
採訪：比華利、魯萍
戲裡戲外，話題最強，立即收睇《動戲場》:
http://hk.movies.nextmedia.com/extra/list/