中環H&M旗艦店無論開張時或者舊年因租約期滿結業，都引嚟一陣哄動。原來H&M被逼出中環後，一直有計劃喺銅鑼灣開店，新近租落恒隆地產（101）位於銅鑼灣嘅恒隆中心4層，仲升呢做全球旗艦店，市傳月租1,000萬元，最開心一定係恒隆老闆陳啟宗啦。
霸晒四層 踢走莎莎
新店面積約4.6萬平方呎，相對之前中環旗艦店（約3萬平方呎）、同𠵱家喺香港最大間嘅廣東道分店（約3萬平方呎）都要大，預計明年下半年開業。
H&M租晒恒隆中心4層零售樓面，𠵱家租緊嘅莎莎（178）、百老匯、萬寧、Francfranc同幾間食肆都要讓路，而莎莎同Francfranc已經喺附近另覓新舖。
其實，H&M中環旗艦店俾ZARA霸咗之後，喺港島區嘅分店只得太古城一間。H&M公關話，公司一直想喺港島區搵個新舖位，今次開嘅全球旗艦店，亞洲區只此一間，規模媲美紐約同洛杉磯嘅旗艦店，將會好齊貨咁話。
H&M粉絲高興之餘，最開心一定係陳啟宗。事關近年圍繞恒隆嘅消息都麻麻哋，多數係高層走完一個又一個；在港好日唔賣樓，舊年推售浪澄灣貨尾，又引嚟一班南亞裔排隊黨，搞到要警察到場。今次將恒隆中心租咗畀個大客，算係沖喜吓。
除咗恒隆中心，對面嘅名店坊一帶其實都係恒隆地盤，聽聞，公司正計劃優化整個銅鑼灣零售商戶組合。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange