【大坑】吳千語同男友拍拖成日孖公仔咁出雙入對，不過嚟緊男友要開工，千語BB惟有搵其他朋友陪佢解悶，前晚千語BB約咗好姊妹何超盈，同之前喺鬧市照顧醉酒文詠珊嘅富家女Carmen等人喺大坑食糖水，同行仲有同超盈傳斷背緋聞嘅林建岳乖女林愛兒，一行五個女仔喺谷祖琳開嗰間小甜谷嘆甜品，實行全女班傾密偈。
當晚千語BB、超盈同愛兒等人就揀咗坐喺舖頭門外啲位，見佢哋都叫咗唔少甜品，除此之外仲買咗隔籬舖嘅分子雪糕，幾個女仔一齊嘆，分甘同味又唔怕肥，一舉兩得。身形纖瘦嘅千語BB雖然冇男朋友喺身邊，但係胃口依然唔錯，不時大啖大啖甜品放入口。至於超盈都唔輸蝕，食之餘仲手舞足蹈咁講嘢。不過唔知係咪坐門口多人經過，超盈同林愛兒只係打對面坐，表現避忌，但當超盈講嘢時，愛兒特別留心聽。
短裙晒長腿
食完講完約半個鐘後，愛兒先行埋單，跟住五個女仔就離座，千語BB着住短裙晒長腿，引嚟唔少目光，最後佢同超盈坐愛兒架黑色波子跑車走，千語BB好識做主動坐後面，司機位隔籬當然留番畀超盈，唔知佢哋三個係咪仲有下場？
採訪、攝影：畢紹基、黃曉程
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24