尖啤劉夢熊舊年捲入東方明珠串謀詐騙案，又涉嫌發電郵威脅特首梁振英同廉政專員白韞六。新年伊始，尖啤又惹官非，俾恒生銀行入稟控告，話佢幫一個叫張瑞嘅女子做擔保人，為豪宅禮頓山單位連車位做按揭，𠵱家要追討拖欠供款，仲透露尖啤同張小姐係同居喺呢個單位㖭。土地註冊處資料顯示，單位係張小姐喺06年以3,000萬買入。尖啤噚日喺電話同記者講，話知道張小姐近排去咗旅行，一時唔記得供樓咁箒，會嗱嗱聲搞番掂佢，仲話個單位市值已經去到6、7,000萬，張小姐只係爭銀行6、700萬，濕濕碎箒。但一問到尖啤同張小姐係乜嘢關係，一向金句多多嘅尖啤即刻口窒窒，話自己只係擔保人，又話自己開緊會，匆匆收線。早前有雜誌話尖啤同一位叫張瑞嘅內地女子交往廿多年，唔知係咪同一個人呢。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange