昨夜草筆完文，仍感義憤難平，事實上，回歸以來傳媒遭受各式輕重有別、各樣軟硬不一的打壓，又豈是寥寥數語足以作結。小秘及後傳來一文，縱未言出處，怕也是出自她的媒體友好手筆，非但道來新聞業界面對的陣陣冷鋒，更將一角之下的冰山呈現。以下原文大半照錄，惟亦略有改寫，少不免狗尾續貂，望作者見諒。
《南早》換政協總編輯變《紅早》，我唔出聲，因為我唔識英文。
然後《紅早》總編縮小李旺陽事件的報道篇幅，當下屬有所質疑時，拒絕解釋之餘，並直斥：If you don't like it, you know what to do。我唔出聲，因為I don't care what to do。（我剩係識呢句英文）
《陽光時務》創辦人街頭遇襲，我沒有出聲，因為我唔識佢係乜水。
《蘋果日報》接連被縱火燒毀，我又唔出聲，因為《蘋果》啲狗仔真係好狗。而佢哋老細肥佬黎家遭撞閘兼放刀斧，我又唔出聲，因為有人話佢係賣國賊。
轉頭《蘋果日報》發行商勤力德老闆遭鐵騎士持牛肉刀斬傷，其實我係唔知道，因為幾乎冇傳媒報道。
《am730》老闆施永青駕車被截停兼被鐵鎚打爆玻璃，我又唔出聲，因為他是地產霸權的既得利益者。
《信報》換河蟹總編輯、抽起「獨眼香江」 版文章，引發該版全組人請辭。我唔出聲，因為我從來唔睇這份扮精英的報紙。
《成報》將劉夫子的文章擅自篡改，曲解取義，及後更終止其專欄，我不聞不問，因我都冇先人係睇開呢份「燒」量最高嘅報紙。
《經濟日報》刪去周博賢專欄文中出現的「梁振英」，猶如古代的帝名忌諱，我唔出聲，只要其股評的貼士準繩。
《明報》總編輯唔聽話被調走，編輯部面臨整肅，我又唔聲唔聲，因為聽聞個總編份人好串。
《主場新聞》被網絡攻擊，我又唔聲唔聲，因為我都唔上網。
《獨立媒體》被襲擊，我梗係唔出聲，因為佢哋成班左膠。
《香港電台》烽煙節目叮走吳志森，我唔聲唔聲，因為仲有隔籬台李慧玲。
到《商台》的公公把李慧玲從黃金時段烽煙節目調走，我又唔出聲，因為李慧玲好嘈， 同埋把聲好難聽。
DBC被「商業糾紛」所擾，大班出走，我唔出聲，因從來唔想畀錢買數碼收音機。
ATV對新聞的踐踏縱是慘不忍睹，不過我都唔出聲，因為我從未睇過呢個台。
TVB的偏頗報道，「事旦」手法，我又冇出聲，因為我只會煲劇，關心子華同Cool魔邊個攞視帝。
最後，我發現香江忽然十分和諧，乜新聞都冇。原來《23條》已獲高票通過，政改決定擁護一黨專政……
罄竹難書的實例，難道還會是個別事件嗎？所謂新聞自由和編採自主，倒頭來不過就是新聞自審和編採自閹。當然「自審自閹」者總有百般理由，而媒體對於新聞的取捨，究竟是出於審查，還是基於編輯的客斷判斷、或規避法律風險，也許難以判斷，惟信新聞媒體手執監察社政的第四權，而市民大眾卻又是監督媒體的最終把關人。
根據無國界記者統計的「新聞自由指數」，香港的新聞自由在2002年的18位，下跌至年前的58位。事例驚心，排名動魄 ，「我」還能唔出聲咩？
註：以上部份文章體裁取自德國牧師馬丁．尼莫拉，在納粹魔掌下所寫的《起初他們……》。
盧先亞
足本收睇《亂噏24》x鄭秀文＠杜琪峯；再有卓韻芝！
周一至周五《亂噏24》約定你： http://bit.ly/appletalk24