雞髀打人牙骹軟真係千古不變嘅定律，擔起成支政改大旗嘅政務司司長林鄭月娥，呢排頻頻安排同立法會議員喺飯桌上面傾大事。呢啲政治飯，原來班議員唔單止有好嘢落肚，臨走嘅時候仲有好嘢揸手㖭！有乜嘢着數？就係一人一樽由官邸大廚自家秘製嘅「司長辣招」XO醬囉。
司長出招，唔講得笑，八方聽到有人打趣話，林鄭之所以送「辣招」畀議員，根本就係想辣到班議員出唔到聲。食過林鄭XO醬嘅議員，都對佢嘅「辣招」有讚無彈。
足料惹味 何秀蘭唔受
雖然自由黨踩狼振英嘅樓市辣招踩到一文不值，但對於林鄭呢款「辣招」就讚譽有加，有該黨議員形容林鄭啲辣招嘅辣味同鹹味啱啱好，而且非常足料，有好多乾瑤柱同蝦米，相信平時用嚟撈麵配水餃都啱。唔止建制派，林鄭嘅辣招亦頗得民主派議員受落。好似鍾意食辣嘅公民黨湯家驊都忍唔住拎番樽返屋企試吓，不過佢好小心，冇做白老鼠第一時間就開嚟食，仲打聽到林鄭呢招都幾辣吓。
但正如樓市辣招一樣，林鄭嘅辣招都唔係人人啃得落。工黨何秀蘭就對林鄭呢招不屑一顧，費事拎番屋企製造廚餘，民建聯黃定光直頭對辣冇興趣，拎返屋企後順手就畀咗老婆算數。
林鄭政治飯餐單
【第一晚】
粉葛赤小豆鯪魚唐排湯
野菌豆腐
薑米碧綠蝦仁
清蒸海斑
番茄烤肉排
咖喱雞（配白飯）
紅豆沙湯圓
生果
【第二晚】
花生木瓜雞腳湯
冬菇扣海參
清蒸海斑
清炒田園時蔬
農家紅燒肉
沙嗲牛肉腸粉
椰撻
生果
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange