Old soldiers never die；They just fade away.
1951年4月19日，麥克亞瑟將軍被杜魯門用不光彩方式解除韓戰聯合國軍最高統帥職務，返美後應邀到國會演說，演說的最後，他用這句話作為結。究竟係乜嘢意思？其實是表達自己無奈。麥帥是經歷一、二次大戰老兵，盟軍統帥，韓戰指揮，最終卻因與杜魯門不和，被突然解除職務，更難堪係此決定並非由總統口中得知，而是來自其他非官方人士之口。
報紙陸續歸邊 感無奈
九十年代係香港傳媒風起雲湧年代，九一直選後立法局大樓內press room人頭湧湧，大家磨拳擦掌，相信可以為香港幹一番事業，經歷八九六四，當時年輕記者感受到時代呼喚。民主派九一直選大勝，係前線記者期待的結果。記者支持民主派，也支持香港民主化，是香港歷史一部份，共產黨今日要清算香港傳媒高層，就係當年那一批中層及前線記者。
呢班在press room出入記者，大部份已退下火線。九七後歸邊嘅佔咗大部份，主流媒體管理層都知道「識做」，坦白講，今日仍未完全歸邊媒體三隻手指數完，但係仍有人相信民心未回歸，係因為傳媒「興風作浪」，尤其係一班八、九十年代出身之傳媒人。對不顧香港歷史現實之內地官員來講，就係要清算呢批人。而所扣帽子，就係勾結泛民。
同代傳媒人只有兩種選擇，一是盡快歸邊，跟從黨宣傳指示，在政治議題報道上，要識得看大局，睇長遠，另一是告老歸田，或被調離編採崗位，投閒置散。寫評論嘅亦唔見得好過，「梁振英」三字亦成為敏感詞要刪除。用政治手段整治香港傳媒，結果只會加速主流媒體淪亡衰落，因為民智已開，當報紙轉軚，公眾會睇得見，公信力越低，報紙死亡速度越快。
只不過睇住一份曾代表香港知識分子價值信念嘅報紙，落到如此田地，總會覺得難過。尤其想到，今日香港，《信報》、《南早》已歸邊，「識大局睇長遠」，如今連一份《明報》也要歸邊，呢種無奈，已非《明報》淪落問題，而係香港集體淪落，至於一直保持沉默嘅香港公共知識分子，更令人搖頭嘆息！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange