喺大行分析員大合奏之下，呂志和旗下銀河娛樂（027）股價屢創新高，噚日收市又刷新紀錄，高見78.1元。銀娛隨後公佈，搵到娛樂大亨林建岳私人投資嘅著名意大利餐館8 1/2 Otto e Mezzo Bombana，過大海去澳門銀河綜合度假城第二期開設分店，呢次仲係岳少首次衝出香港，喺其他地方開食店。
位於中環嘅Bombana連續3年攞到米芝蓮3星，唐英年、林青霞等名人經常幫襯，出晒名好難訂位。行政總廚Umberto Bombana有香港白松露王之稱，最近就送咗一批黑、白松露畀呂志和阿仔、即係銀娛副主席呂耀東，以示落實呢單刁，新店將於明年中開張。
其實市場一直傳緊，銀娛正物色頂級食肆進駐旗下賭場酒店，消息人士話，銀娛仲傾緊其他高級食肆。
足本收睇《亂噏24》x鄭秀文＠杜琪峯；再有卓韻芝！
周一至周五《亂噏24》約定你： http://bit.ly/appletalk24