碧琪噚日話畀菲菲聽，話港鐵（066）真係好識搵銀，連畀小朋友度高把呎，都搵到贊助。印象中，以前把尺係得隻幾可愛嘅長頸鹿。八卦嘅菲菲即時就上網search，原來港鐵喺早幾日前，亦為呢位贊助商post咗幾張相上fb。就相中可見，長頸鹿仍然存在，但條頸嘅旁邊，竟然多咗隻牛，上邊再加上一個醒目嘅logo－－蒙牛（2319）。
一子錯，滿盤皆落索。當一個品牌個朵曾經臭過，要翻身就要比對手用多100倍嘅努力去宣傳。
雖然單睇蒙牛股價，唔單止已擺脫幾年前「毒奶」風波嘅低潮時期，上季更借行業整合，獲欽點為乳業國家隊而順利破頂。奈何想當年嘅新聞鬧得太大，香港人再善忘都唔會唔記得「三聚氰胺」呢種物質，再加上唔少人對內地食品充滿戒心，蒙牛希望以同一個招牌，再獲港人青睞，睇怕貼多幾千張度高呎都唔掂。不過，旗下高端品牌「特侖蘇」反而有機幫蒙牛賺港人嘅錢。
早排見「特侖蘇」於港鐵勁賣廣告，代言人係郎朗，相信唔少港人單睇廣告排場都未必知「特侖蘇」係蒙牛嘅副線。連本欄前鄰居瑪姬兒嘅另一半都曾經被廣告吸引，行超市時差啲買咗（最後被瑪姬兒制止）。可見只要識做宣傳，改過個名，又係一條好漢。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange