為何要用錢買Like?自己知自己事,你貼一張爛鬼牛扒相,難道認為要有十萬人俾Like?你感懷身世「天氣不似預期,我今日先嚟M……」你難道又覺得應該值幾百個開心Share嗎?
即使你用錢買Like,也不會令你的爛鬼圖片起死回生,買粉絲的偶像,終究不是天王巨星。
錯錯錯,你真正大錯特錯,買Like買人氣,其實就和女人戴神奇胸圍的道理一樣。
戴神奇Bra和買Like買粉絲,都是造假,但,誰人知呢?除非伸手入衣領捉摸,否則你不會知道那個𡃁模其實是裝胸作勢喎?
同樣道理,誰會知道你的粉絲是買回來的呢?誰敢判斷你的MV有五十萬人觀看,全部都是假的呢?
真金不怕洪爐火,假胸最怕人來摸;但放心,邊有咁多洪爐火啊,誰敢摸你的胸啊?
還有,A至Z的女人都戴神奇胸圍,你堅持真材實料,便輸足九條街,所謂「不要讓女人輸在事業線」。
全世界都造假只有你一個求真,那麼你平板電腦的身材,只會令你丟架。
同樣道理,你堅持不買粉絲不買Like,但人家的專頁粉絲數量幾何級數般上升,你的清高只會讓人看見你的冷清囉……
最重要的是,這個世界其實不是「有麝自然香」,而是西瓜靠大邊,瘦田耕開才有人爭。
講笑話為甚麼要有罐頭笑聲?因為人很容易受騙,再難頂的笑話,如果有了罐頭笑聲,有人發笑,你潛意識便會覺得:「其實都幾好笑啊。」
再廢的文章,如果你瞥見有五百人Share咗,有一千個Like,你也會自己說服自己:唔通我唔識欣賞?莫非係因為呢個Point所以吸引咗咁多人Like?睇睇吓都好似……OK喎。
你現在明白為甚麼CY落區都要安排好一批支持嘅市民,都係買Like保平安囉。