電視風雲真係峰迴路轉。電視廣播（TVB，511）出招，宣佈終止租用發射站予香港電視（1137），仲要用中移動（941）內部調查做借口，令事件更耐人尋味。
於《電訊條例》下，通訊事務管理局可介入處理，TVB唔能夠妨礙任何訊息傳送。如果你相信香港依然係法律最大，咁TVB呢一招，最大效果都只會係拖延香港電視開台時間，唔會扭轉到局面。以王維基當年搞香港寬頻嘅track record，佢唔肯租電盈網絡，堅持自己鋪網，雖然短期要捱，但長遠來講勝負已見，所以王維基今次肯定都會諗計，自己建發射站，或者用其他方法擺脫依賴TVB。除非TVB再有後着，否則整唔死人之餘，只會令自己形象繼續插水。
原本流動電視技術未夠方便，其實好難同免費台爭。但以時下民情，海迪就算冇時間睇電視，都會特登買個接收器。有零售商高層就話，佢哋上年於TVB冠名贊助一個節目，不幸遇上「熄機事件」，要擔心收視之餘，又驚步「雞汁」後塵，所以以後都係咪搞佢。只要香港電視收視OK，唔需要勁過TVB，佢都會肯落廣告支持。
TVB其實競爭能力好高，如果肯發奮圖強，邊有人郁到佢？TVB急切要做嘅，係做返好啲節目，搞小動作恐怕會適得其反。
海迪
足本收睇《亂噏24》x鄭秀文＠杜琪峯；再有卓韻芝！
周一至周五《亂噏24》約定你： http://bit.ly/appletalk24