黃色巨鴨Rubber Duck舊年喺香港掀起旋風，噚日就有隻巨雞出現油麻地避風塘，原來係吳君如新戲《金雞sss》嘅巨雞，呢隻雞有個雞冠同稜形嘴，現場海報掛住：「Rubber Duck走了，金雞來了」。LMF成員Kevin跑步經過見到，即刻影相擺上網，抵死謂：「咯咯咯……咯咯咯……起身喇！上次影唔到隻鴨，今次影番隻雞都好！」
遭余文樂胸襲
君如為呢部戲碌盡人情卡，搵咗余文樂、甄子丹同黃秋生等客串演出，君如仲要俾扮電車癡漢嘅阿樂熊抱揸胸兼猴擒硬上，戴假髮同眼鏡嘅阿樂造型邋遢，佢話：「我一直好崇拜君如姐，今次能同佢合作，又係做喜劇角色，真係好過癮！」
秋生就化身古代嫖客搞笑，佢𥄫住君如嘅倒模38G假波，露出O嘴浮誇表情，令人噴飯；至於甄子丹就梁朝偉版葉問上身，擺出偉仔嘅一代宗師招牌甫士，對白仲好盞鬼，君如問：「葉師傅，你點解好耐冇嚟玩？」甄子丹一派正經答：「我唔好此道。」點知俾君如取笑：「你唔係好鍾意一個『搞』十個咩？」甄子丹連忙澄清：「我是一個『打』十個！」
撰文：馮仁昭
戲裡戲外，話題最強，立即收睇《動戲場》:
http://hk.movies.nextmedia.com/extra/list/