一個月前，本欄推介手機遊戲股IGG（8002），指其盡攬科網及濠賭概念，當時股價3.82元，目標中線升一倍。坐到昨日剛好一個double，收報7.67元。本來諗住叫各位戰友食糊，但下午IGG公佈與騰訊（700）合作，刨完新聞、計完數後，發覺現價實在太便宜了，不推不行，新目標價：中線升多一個開，睇15蚊。
IGG今次將最賺錢的手遊「城堡爭霸（Castle Clash）」的強國獨家代理權授予騰訊，3月起就會登陸旗下社交平台，如無意外，就係QQ及微信。
管理層講，遊戲的海外註冊用戶有2,000萬，每月收入900萬美金；泊埋騰訊平台後，用戶應該多1億，即係增長5倍，收入多咗4,500萬美金，當跟行規同騰訊三七分賬，都有千五萬，埋單每月收入2,400萬美金，一年齋呢隻手遊就收22.5億港紙！
純利又點呢？光大報告預測今年賺4,000萬美金，按年增長一倍，但路邊社消息指，IGG上季業績會好靚仔，單計12月都賺400萬美金，今年照乘都5,000萬美金啦！不過，呢個預測完全未計加入騰訊平台的因素，大致算一算，應該兩億美金走唔甩，即係15.6億港紙。對番今日市值（104億元），預測PE唔夠7倍，現價真係「蔗渣價錢、燒鵝味道」，升多一個開，14倍PE先叫較為合理。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange