今年真係炒股唔炒市，特別係創仔，暴升超過5倍至10倍嘅，真係周街都係，有波幅又有升幅。例如羅馬集團（8072）招股價0.3元，以上星期五收市價3.25元計，升足9.8倍。鉦晧控股（8132）喺2013年又由低位升咗15倍，喺去年曾經上到最高位2.47元，甚至係升足22倍。
Prof J認為，捉到老鼠嘅就係好貓，梗係唔理係白定係黑啦。一個唔好彩過咗個潮流，貓王都只會被人淘汰，或者放喺蠟像館等人參觀。
食住2013年到2014年香港品牌熱賣嘅主題，「易認有錢剩」，Prof J喺2014年立志成為各位粉絲嘅「股壇飛貓」，向10倍股全面出發！Prof J就發現譽宴集團（8107）擁有呢種亮光。譽宴上市之後表現硬淨，昨日收市價報2.34元，比招股價升咗1.3倍。有成交，有波幅，有升幅，證明佢係有熱捧特質。農曆新年前嘅目標價係3.2元，Prof J睇咗2014年係雙春兼潤月，生意肯定有guarantee，一於時勢做英雄，勇往直前！
之前Prof J叫大家放棄恒盛地產（845），完全係有根有據！近期各方全力吹大嘅上海自貿區概念，恒盛地產旗下物業價值竟然未有受惠而提升。最慘就係股票流動性又低，導致近年股價嚴重大折讓。
恒盛執行力弱
攞你命嘅係，恒盛因為執行能力太弱，令到過去兩三年實際物業預售未能到位。
最攞你命嘅，就係第二大股東中國人壽（2628）已經表明支持恒盛私有化。強兵已退，不敢妄進！最怕就係私有化失敗！Prof J覺得應該留前鬥後，接受私有化，送佢哋離開交易所，留錢追譽宴，追蹤Prof J喺2014年留意嘅其他股份，更加實際喇！
徐燦傑
中國銀河國際財富管理主管
本欄逢周三刊出
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24