睇投資專欄，當然係想拎「冧把」賺錢，但照買如儀後，是否就能輕鬆獲利？答案當然是否定。舉個例，魏力周一推介中動向（3818），認為其走勢現突破，但高開後卻倒跌收場，究竟是假突破，抑或破位前的「後抽」？開市買入的話，賬面已輸4%，究竟應否止蝕？如不幸被大戶震走的話，就無法享受昨日8%的升幅了。
再舉一例，上月中推介寶威（024），於0.55元水平呆足兩星期，昨收市前3分鐘先發力，一飆就14%，如冇耐性坐貨，一心諗住突破再追入的話，99%肯定追唔到。如果5毫半沽了，更不會0.64元追番。今次大戶收齊貨開車，相信會絕塵而去。買入股票後，只要走勢冇走樣，應該是安心坐穩，而不是嫌升得慢而沽。
回說大市，指數企穩，輪到強勢股有沽壓，金山軟件（3888）回吐4%，但細心留意，昨日的低位幾乎就是11月的高位，顯示該水平已現支持，屬破位「後抽」，升勢並未逆轉。IGG（8002）、嘉里物流（636）、信義光能（968）等半新股，仍屬大漲小回格局。
風電股持續強勢，金風科技（2208）昨再破位漲4%，報9.24元，圖表靚到無倫。去年首三季賺1.88億人仔，當全年盈利3億人仔，預測PE僅12倍，仍有唔少水位，以12蚊為目標，PE仍未夠16倍，屬「有買貴、冇買錯」之選。
魏力
http://www.facebook.com/2012jason
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24