由黃精甫執導、安志杰同伍允龍主演嘅新片《惡戰》前晚喺尖沙嘴海運戲院舉行首映禮，同伍允龍老友鬼鬼嘅謝霆鋒自然嚟捧場，就連霆鋒嘅父母謝賢（四哥）同狄波拉都有到場，不過就唔見安志杰嘅舊愛謝婷婷。
霆鋒同拉姑、鬍鬚Kong先到場，搞到成班記者即衝晒去佢哋度，最弊係台上進行緊儀式，突然台前唔見晒啲記者，個場面都幾尷尬，好在司儀都即刻叫霆鋒過嚟影合照，霆鋒影完都好識做自動消失唔搶鏡，點知後嚟四哥到場時又係引到成班記者過檔，似乎嘉賓比主角更加大吸引力。
等鍾嘉欣回港睇戲
事後安志杰就話見到謝家唔會尷尬，因為之前喺《救火英雄》已見過拉姑佢哋。而伍允龍就話鍾嘉欣𠵱家喺韓國拍緊戲，要等佢返香港後先補請佢睇。兩位主角齊齊着西裝出現，安志杰就話：「我本來諗住着牛仔褲同踢拖，不過伍允龍要着，就要配合佢。」首次擔正嘅伍允龍就直言希望觀眾入場睇戲時，佢哋可以娛樂到觀眾啦！
此外，婷婷噚日單拖到中環置地行街，入咗間時裝店睇衫，但最終都空手而回，對於細個時有冇跟父母同邵逸夫飲茶，佢話：「4歲時有見過六叔，同佢飲茶，之後嘅嘢就唔係好記得。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！