要數當今球壇嘅「好好先生」，相信西班牙鋼門卡斯拿斯絕對拍得上前城中筍盤陳豪，穩坐第一。上周五「聖卡斯」亦榮升人父，前日更首曬抱B照，冧死一班女粉絲。眾所周知，32歲嘅皇馬球星有個記者女友莎拉，而且僅此一位，球場外嘅私生活極為檢點。相信聖卡斯鏡頭前最瘋狂嘅一次，絕對係2010年世界盃西班牙捧盃後，接受女友訪問期間突然向佢激吻，個人認為呢個經典場面，絕對要收入10年世盃嘅精華片段裏面。
球星換女如換球衣，難得卡斯拿斯出淤泥而不染，3年來同莎拉如膠似漆，𠵱家初為人父，難怪囝囝馬丁出世後，佢首日返到皇馬操練嗰陣，球隊上下都拍爛手掌恭喜呢位隊長。
聖卡斯晒幸福上傳抱B照，馬丁嘅正面雖然睇唔到，但初生BB「千人一面」有咩好睇；反而喺皇馬過得不太如意嘅隊長，喺相中就流露出喜悅同愛意嘅眼神，更話馬丁係自己32年來收到最好嘅禮物，長駐「雪櫃」嘅聖卡斯踏入14年，總算有件溫暖窩心嘅事！
文：呂晨
以女性角度看球星新聞，唔用眉筆用原子筆寫低球壇百態！
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24