睽違8年，「拳霸」柏朗伊雲（Tony Jaa）終於為05年的電影《冬蔭功》拍出續集《冬蔭功2》，今次柏朗伊雲繼續玩命兼攞人命，批踭膝撞加飛刀飛車飛腿樣樣齊。嫌悶？佢玩埋飛車加跳橋；嫌睇厭佢個樣？佢搵埋靚女女拳霸助陣。呢份冬蔭功，認真惡啃，小朋友喺屋企咪亂學！
撰文：鍾國泰
香港上映日期：1月9日
打到出火
睇柏朗伊雲，大家都預期會打到飛起，今次他在《冬蔭功2》亦不會例外，拳腳飛來飛去就意料中事，不過今集就多了更勁的元素。如果對普通拳腳已經出現審美疲勞，柏朗伊雲就多加一些創意，最令人深刻的是，柏朗伊雲化身人間兇器全腳着火起飛腳，之後甚至踢出電，極其誇張，敵人亦不示弱，有女格鬥家更識揈水髮殺人！另外，柏朗伊雲在戲中又有更多玩命場面，其中一幕他更親身上陣從20層樓高的大橋落下，他更曾因動作場面而受傷。
致命度：5分（五分為滿）
狂野時速
不要以為柏朗伊雲只識一味打打打，他轉玩飛車都有一手！有份拍攝《狂野時速 7》（The Fast & Furious 7）的他今集有壯大的飛車場面！不過就不是《狂野》式的跑車對決，只是被數以百計的電單車黨追殺，上演另類壯觀場面，柏朗伊雲中途又要飛電車路軌，匿路軌一字馬避地鐵，又要跳上車頂任人揈，證明柏朗伊雲唔止打得，手車都相當得。另外，今集唔少敵人都揸電單車圍毆柏朗伊雲，他亦無驚過，赤手空拳迎戰，更在天台上打到爆牆！
致命度：4分
3D飛拳
柏朗伊雲之前的《拳霸》及《冬蔭功》都標榜無特技兼無替身，今次《冬蔭功2》有CG，那麼電影有甚麼新賣點？玩3D！柏朗伊雲的拳頭、膝頭本來已經勁度十足兼快到無倫，加入3D效果就令他沙煲咁大個拳頭好似飛出來一樣。電影中新加入3D效果，亦令柏朗伊雲在打戲上有更多考慮，事關要度好位置，配合鏡頭去打，令柏朗伊雲在出拳的美感及速度更加精益求精，變相打戲更精采！
致命度：3分
兩個拳霸
若然覺得只有一個柏朗伊雲仲未夠喉，加多一個「拳霸」又如何？說的是女拳霸Jija Yanin。Jija為了報殺叔父之仇，連番狙擊柏朗伊雲，Jija通曉泰拳、跆拳道及中國武術等，與柏朗伊雲上演人肉攞你命3000之互片，Jija戲中又有孖生細妹幫手。另外，自編自導自演電影《鐵拳無敵》（The Man with the Iron Fists）的美國饒舌歌手RZA就做神秘武術組織頭目，更要同柏朗伊雲連番過招。
致命度：5分
故事簡介：逃命救象
柏朗伊雲上集為救情同兄弟的大象而打到飛起，不過自澳洲一戰後，回到村中過普通的生活，而今集亦是與象有關，柏朗伊雲今次被當成殺害象園老闆的兇手，今次柏朗伊雲除了要逃避追捕，為自己洗脫罪名外，又要解救感情極好的大象，其間象園老闆的姪女又來找柏朗伊雲晦氣，柏朗伊雲在旅程中又被神秘武術組織盯上，背後更關係到國家危機，總之一字記之曰：打！
足本收睇《亂噏24》x鄭秀文＠杜琪峯；再有卓韻芝！
周一至周五《亂噏24》約定你： http://bit.ly/appletalk24