恒指兩日挫逾600點，一月效應明顯失效，中資股輪流洗倉，噚日由劵商同水泥股接力。另一邊廂，半新股、科網股同物流股繼續爆炒mode，完全無視大市弱勢，以暫時牌面睇，炒股不炒市呢個策略，喺2014年繼續適用，戰友千祈咪拗頸，記住跟紅頂白才是王道！
上月底掛牌嘅東江集團（2283）終於重上招股價，呢期半新股破完頂都可以再破，跟住呢個勢行，現水平入場贏面極大。睇番東江分配結果，公開發售超購2.3倍，A組中籤率全部超過一成，B組更加超過六成，但短短半個月已重上水面，證明已震走大部分散戶，現時主要股東持股75%，扣埋部份基金大戶股權，流通街貨隨時只得幾千萬股，要舞上真係話都冇咁易。
東江集團為內地一站式注塑解決方案供應商，主要從事注塑模具及組件嘅設計及製作等，以經營製作注塑模具收入計算，東江集團為內地行業二哥。產品用途廣泛，細至USB手指、智能手機配件，大至汽車、家電、彈珠機、醫療設備等。以2012年度盈利1.35億銀計，現價市盈率僅7.6倍，配合三成派息比率政策，絕對係平靚正之選。最新市值僅10億銀，喺半新股狂潮下，絕對可以升到你唔信。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange