世界有唔少小商戶，做生意都靠一兩個銀行戶口搵食，但一個唔好彩，遇着銀行玩嘢，真係欲哭無淚。
朋友Ann同佢位法籍男友，喺香港經營海產入口生意，規模細細，但生意漸入佳境。至於佢男友一個喺法國滙豐開嘅戶口，因為經常用嚟交易，自然有大量現金進出，最初冇問題，點知去到聖誕節前，佢突然login唔到網上銀行系統。臨近聖誕黃金檔期先交易唔到，當然好麻煩。於是佢打去法國滙豐，用咗幾日，打咗無限個電話，幾經轉折，終於搵到一個人話畀佢知發生乜事。當地負責人擺出高高在上的姿態，通知Ann男友：「滙豐已選擇終止向你提供服務。」最嬲嘅係，負責人堅持唔解釋原因，仲堅稱一早已作出通知，並已開支票回水。咁Ann男友，至今當然一個仙都未收番。
Ann男友個案，絕唔係個別事件。之前滙豐美國、加拿大瘦身，都係無聲無息無解釋下，終止中小企賬戶。分手都要知衰乜，滙豐聲稱「the world's local bank」，卻以莫須有罪名突一刀切了結，絕情之餘，亦有失國際大行風範。
滙豐同Ann男友斬纜，菲菲相信係由於銀行要加強反洗黑錢監管，為免觸及地雷，索性將呢個正當賬戶結束。戶口事小，支票事大，慘在而家連香港滙豐都幫唔到佢，菲菲真係戥佢頭痕。
Fifi
本欄逢周二、四刊出
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24