新春大假就嚟到，又係外遊黃金日子。有調查問咗300位港人外遊最怕係乜嘢，第一位係與生暴（音：生寶）人同遊，58%人話會感到唔舒服；第二位係被迫購買紀念品或被強迫購物；第三位係食物質素欠佳。
呢個調查由網上旅遊公司Expedia智遊天下網進行。點解咁怕同陌生人一齊，部份受訪者講咗啲例子，最普遍係同團友食飯，團友唔肯用公筷，有人仲遇到過一個五人家庭搶晒啲嘢食。其次係有團友瞓過龍，遲足成個鐘，竟若無其事，道歉都冇句，團友呆等之餘，連行程都被延誤。
May姐帶隊 被爆70歲？
仲有人不滿團中家長冇教好小朋友，由得佢哋嘈；不過有人試過參加咗老人團，得自己係後生仔，悶到死。有人認真唔好彩，遇着團友冇公德，喺旅遊巴上放屁，好不滿都唔知點投訴；不過有人就好驚遇着成日complain、complain、complain嘅人。
不過呢，遇着呢位陌生人同團，團友應該幾開心。佢就係醃乜嘢都落雞汁嘅馮美基May姐。
佢會同旅遊教父、康泰老闆黃士心喺3月6日，帶團坐廈深高鐵去潮汕，食勻黃老闆家鄉菜，三日成人團費要4,199起，真係唔平。睇個行程主要都係去May姐推介食府，團友應冇機會試佢嘅雞汁美食。
黃老闆同May姐相識30幾年，大家係死黨，佢為May姐俾網民批評感到不值，「佢係有料嘅人、係好人……佢都70歲，你屋企阿婆去到咁年紀，仲有冇佢咁叻？」
吓，年齡係女人秘密，黃老闆仲以阿婆對比May姐，小心佢嬲咗你呀。根據資料，May姐1945年出生，都係68歲箒，同黃老闆一樣仲係六字頭咋！
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange