金榜（172）揸住會生金蛋嘅祖國融資合營公司融眾，受惠祖國中小企龐大嘅貸款需求，生意越做越有，加埋合營有分拆上市憧憬，金榜肥仔水，買。
金榜主要透過持有40%嘅合營公司融眾，發展祖國財仔業務。單係今個財政年度嘅上半年，金榜嘅純利已經一枝箭咁按年飆升咗27倍到1.1億銀，兼追貼上個財政年度全年純利1.2億銀水位，本年度業績已經坐定粒六。
又家陣支持祖國經濟嘅重要支柱——中小企，佔咗祖國經濟規模超過50%，而單係上年第三季，非銀行嘅貸款公司，釋出嘅新增貸款，高達1,600億銀人仔。祖國中小企對實體經濟嘅支持，起到好關鍵嘅作用，資金鏈唔斷得，所以阿爺明言支持金融租賃業務。又上邊貸款數額亦講明，非銀行貸款業務需求大。喺咁嘅條件底下，金榜掂過碌蔗。
係咁意估金榜今年下半年純利，同上半年1.1億銀相同，全年純利2.2億銀，PE得番5倍。場內中國信貸（8207）預測PE上到11倍，半新股中國信達（1359）14倍，遠東宏信（3360）亦貼近10倍，金榜平咗一半。
又金榜最新PB得0.5倍，上邊中國信貸1.6倍、中國信達兩倍，遠東宏信亦講緊1.3倍，金榜又係平咗一大截。
合營公司具分拆憧憬
金榜最新佔合營公司資產值約15億銀，佔咗金榜總資產值好大比重。隨住合營融眾業務條件成熟，加埋祖國重啟IPO，可以諗到兼憧憬到嘅係，融眾一旦分拆，特別係喺祖國上市，金榜呢壇製作嘅增值可大可小。
呢轉先買金榜優質基本因素，現價（0.42元）翻一番到0.84元，PB先得1倍，未有耐追到行家。
錢雋
細價股專家
本欄逢周二、五刊出
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24