梁振英對學生講直選，話希望將來教科書會寫出香港特首普選係在佢嘅任內達成，跟住隔咗一日，林鄭月娥又對工聯會講，希望將來教科書講到香港直選，會提吓佢與譚志源局長領導嘅政改小組。
未來通識教科書會點樣寫，現在言之尚早，大家都唔知，但梁振英似乎急於做騷，林鄭不甘後人，齊齊表達希望「名留歷史」之心意，非常着跡噃。其實呢啲嘢唔駛打晒開口牌嘅，孟子曰：「行仁義，其利自至」，如果梁振英與林鄭「行仁義」嘅話，那怕歷史不會留名？何謂行仁義？2014嘅現實意思就係將特首普選、立法會普遍嘅普選方案設計方案達致：（一）特首候選人無篩選；（二）基本法要求嘅提名委員會須接納公民或政黨提名（方法可再議）；（三）特首候選人數無上限；（四）立法會廢除功能組別，全部議員由直選產生；（五）立法會投票廢除分組點票。
假如振英做到上述五點，說服中央接納嘅話，香港人必然歸心，振英民望必然大振，想話不留名青史亦不可能。但假如振英暗裏有動作，搞篩選、小圈子提名、不許泛民人士入閘、只得佢一個人得到提名參選嘅話，即使香港有特首普選，振英必然成為香港歷史罪人，未來教科書會寫到佢嘅，當佢係秦檜或魏忠賢囉。
有啲人對左丁山講泰國一人一票普選政府，搞出個大頭佛，政治紛爭沒完沒了，反對派民主黨副主席素貼就得到曼谷中產精英支持，要求廢除直選，首相改由各個界別代表（相等於香港功能組別）組成嘅「人民議會」（相等於香港嘅選舉委員會）選出嚟，是則香港現行制度未必無可取之處。左丁山聽咗，為之啼笑皆非，想當年（1973）不少曼谷大學生灑熱血，為爭民主推翻軍事獨裁，不惜殺身成仁，在法政大學足球場飽受來自上空直昇機之機關槍掃射，卒感動泰皇，密令乃他儂將軍、那隆上校父子兩人及國防部長出國流亡，結束一場血腥紛爭，法政大學校長臨危拜相，之後每一個十年都有一場學生與軍人流血衝突，泰國先至達成21世紀之民主選舉制度。怎麼40年後，曼谷人竟輕言放棄民主選舉，實在諷刺到極，令人無限唏噓，1973的學生枉死了。