去年一眾鞋股表現「鞋鞋聲」，百麗（1880）差啲成最差藍籌，達芙妮（210）更遭芬佬狂洗。達芙妮去年第三季同店銷售按年勁瀉18%，非常恐怖。佢6月時存貨已經同比急增27%、達26億元（人民幣．下同），𠵱家生意仲咁差，嚟緊3月公佈全年業績時張balance sheet，大家已經可以計到會有幾肉酸。
達芙妮近年在公告解釋業績差時，往往都會提及天氣因素，夏天就太熱打風，冬天就太凍有雨，好似舊烏雲淨係出現喺佢哋舖頭門口咁。其實網購普及，鞋股同其他消費股一樣受到打擊。原本以為鞋始終要親身試，網購影響應該冇咁大，但平均100蚊左右一對嘅價位，實在係太便宜，平到消費者會願意冒險試吓，而達芙妮嘅價位正正就係100幾200蚊，自然首當其衝。
但講到尾，網購嘅威力係咪真係完全無可抵擋？其實網購只係一個渠道，佢嘅效果，係令消費者嘅選擇和話語權大增，但如果你嘅product夠好、marketing做得足，令消費者覺得幫襯你係物超所值，又何須咁驚網購？本港品牌利信達（738）過去一年，同店銷售持續有雙位數增長，9至11月同店升14%。據講公司期內加密了trade fair數目，變相縮短了lead time，同時增加補貨比重，加強廣告宣傳。所以生意並唔係冇得做，視乎你有冇用心做而已。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange