港鐵服務踏入35周年，噚日喺彩虹站揭開慶祝序幕。1979年10月1日，當年叫地下鐵，全長八公里，只得九個站，由石硤尾至觀塘嘅首班地鐵通車。第一代地鐵車廂重現眼前，光滑如坐滑梯嘅座位，相信叫乘客最難忘。
當年着上紅色制服，俾人叫「紅衫魚」嘅石硤尾站公關助理（客務大使）孟笑薇，噚日再度現身。佢話服務港鐵至今35年，睇住唔少細路成長，成家立室請佢飲。港鐵仲會喺地鐵站推出特大海報，介紹乘客Jamie同Horlick喺大學時代坐地鐵邂逅締結情緣，然後07年喺地鐵站內舉行婚禮嘅浪漫古仔；仲有1979年仲係9歲嘅肥倫，老竇通車當日帶佢搭地鐵，今日父子兩人仍係港鐵常客。港鐵35周年巡迴展覽，喺彩虹站展出後，會移師荃灣站同中環站。農曆新年花車巡遊，仲會以第一代列車做藍本做設計。
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24