金融服務界前立法會議員詹培忠（金勞詹）早排通知晒各方好友，將於今晚7點半喺亞視主持節目《香江怒看》，月旦時事。佢噚日同一班拍檔喺電視台切燒豬拜神希望開工順利，並預告首集會先砌CY，評論CY上任一年半有乜表現之類。
呢個節目逢周二、周四晚出街，係錄影節目，主要分兩個部份，分別批評時事同埋人物，目標人物包括CY、司局長、立法會議員等等。一向牙擦擦嘅金勞詹謙稱自己今次係新丁，怕到時冇咁多料去批評，填唔滿每集半粒鐘。
金勞詹有「潮州怒漢」之稱，大家都等住睇佢表演，睇佢到時批評得有幾激，可能仲會有料爆都未定。金勞詹就話，希望做到善意忠告，並非惡意中傷，總之就係講事實，喺政壇多年，佢對好多事情都心中有數。
至於佢收幾錢做節目？佢回復牙擦本色，指冇人請得起佢，今次係義務性質。
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24