意甲聯賽喺周日歇冬後重開，費倫天拿主場迎戰利禾奴以1:0小勝全取3分，不過前鋒基奧斯比羅斯喺比賽中被對手踢傷，之前佢曾兩次右膝受到重創，好在今次唔再係十字韌帶撕裂，但隨時要唞成3個月。黑仔前鋒又受傷，好彩意大利國家隊主帥柏蘭迪利即刻出嚟聲援佢，世界盃夢仲未破滅。
呢場亦係意大利中部托斯卡尼地區嘅打吡戰，費倫天拿主場出擊藉干沙路洛迪古斯喺66分鐘建功，以1:0小勝利禾奴。但係不幸嘅事情喺71分鐘發生，羅斯被對手守將連拿奧度粗野攔截踢傷右膝，倒地後非常痛苦要即時離場。
效力黃潛艇兩度重創
羅斯嘅足球生涯真係多災多難，佢喺11年10月效力維拉利爾時右膝嚴重受傷，十字韌帶受重創下接受過幾次手術；到咗12年4月諗住接近康復，點知喺復操期間再整親同一部位又要長唞。費倫天拿都算夠膽色，喺13年1月當時羅斯仲休養嘅時候簽佢返嚟，前後冇踢波接近兩年之後，終於等到佢喺上季意甲煞科戰先首次上陣。到咗今季羅斯狀態大勇，經過近半季後入咗14球喺意甲射手榜領先，亦都已經重返意大利國家隊，點知……
費倫天拿教練蒙迪拿都對羅斯嘅情況好擔心：「我哋都好擔心羅斯嘅傷勢，佢會喺比賽之後一日接受詳細檢查。對手嘅攔截係蓄意嘅，之後佢連道歉都冇。」球會喺周一確定羅斯係第二程度膝關節側韌帶受傷，要經主診醫生再檢查先知要唞幾耐。
柏帥：我哋等緊你
羅斯喺08年首次入選意大利國家隊，佢亦有入選意軍喺2010年南非世盃嘅28人初步名單，但可惜喺最後關頭被剔出冇份踢決賽周。
有報道指今次受傷要3個月先康復，計計數其實仲趕得切去踢世盃決賽周。意國主帥柏蘭迪利亦第一時間話：「加油羅斯仔，我哋等緊你返嚟。你有足夠頑強鬥志再捱過去，亦知道國家隊係幾咁需要你。」我求大俠都撐你，加油羅斯仔！
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24