要具體咁形容港股目前情況，可以話係港九新界打大風，但離島就陽光普照咁，背馳情況比起千禧年科網股時代更嚴重。
論恒指圖表真係越嚟越差，不過個股炒作氣氛依然熱烈，由於近期升市、跌市定係大跌市都一樣有嘢喪炒，咁搞落去，個股狂潮要爆煲，似乎就真係因為嚴重超買、泡沫爆破。
領袖股瘋炒入倒數階段
如果睇埋領袖股嘅周線圖，你亦可以感受到瘋炒階段喺度倒數緊，銀娛（027）同騰訊（700）嘅9周RSI有機會形成緊頂背馳，中長線睇係暴風雨前夕，短線幾時先完就點會估到。
領袖股已經接近爆錶，睇唔出細股情況有幾唔同，所以目前短線炒得一日得一日，反而相對長期持有安全。
不過，近期又唔係話落鑊炒就有錢賺，如果炒半新股，你噚日唔係買伽瑪物流（8310）、工蓋（1421），而係調整當中嘅神州數字（8255）、中滔環保（1363），你噚日可能捱緊價。反正去到華泰瑞銀（8006）一送五紅股除淨單日炒得起近一倍嘅環境，咁就唔需要持貨咁耐，短線今日買、聽日沽，甚至即日鮮，隨時已經搞得掂。
呢期隻股有少少炒上誘因，一起動就追，可能先係王道，呢種玩法，希望未去到突然死亡。
消費股或成下輪焦點股
近排連冇concept嘅半新股一樣被進擊，至於科網股嘅網購概念又shift埋去物流股，遲吓唔知會連消費股都炒埋。
安踏（2020）啱啱就有美林唱好，美林話佢定單強勁，嚟緊可以有高單位數字增長，而訂貨會表現相信亦會唔錯，受消息刺激，上星期五股價就爆上8%，噚日其他波鞋股回吐，佢繼續逆市升0.6%。
實際上，講呢啲，邊度有人會聽，重點係炒科網股之後，網購概念殺到去物流股，之後殺埋去消費股亦唔出奇。
波鞋算係內地網購熱門產品之一，如果憧憬網購會令人買多咗波鞋，安踏股價都好有理由可以炒埋一份，短線有機會上試之前12元高位。
講完個股，講番恒指，走勢極之惡劣，先講日線圖，由上年8月形成到而家嘅上升通道底部（23100點左右）已經失守，仲要穿埋9月形成到而家嘅複式頭肩頂頸線（22800點左右），確認中線強烈利淡，7月到𠵱家嘅升浪幾可肯定已經結束。
至於1月初個短線反彈浪，連保歷加通道中軸（現延伸至23228）都收復唔到，未來數周相信會反覆尋底。至於周線圖，經常成為中線支持位嘅保歷加通道中軸亦已經失守，MACD已經確認咗沽售訊號，強勢已不再。各位真係唔好期望恒指可以顯著回升，中資股？算吧啦。
晉佳
編按：智取大市暫代板塊尋寶一天
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24