廿年前，有位日本小朋友寫咗一篇《我的志願》，佢寫住：「我要喺世界盃揚名立萬，然後有外國球會邀請我，前往意甲，成為主力，穿上10號球衣，為球隊發光發熱。」今年，呢位小朋友已經長大，仲達成夢想，加盟AC米蘭，未來將會着上紅黑軍團嘅10號波衫，佢就係本田圭佑。
兒時已係A米球迷
上星期六晚，米蘭機場逼滿人，有揸住攝錄機同相機嘅記者，亦有着A米波衫嘅球迷，加加埋埋都成幾百人。唔使等好耐，着住西裝，戴住黑超嘅本田，好似英雄咁行出嚟，即時引起哄動。本田心情好好，唔止同球迷揮手，仲接受記者嘅訪問：「我終於夢想成真！嚟到呢度，我好激動！我喺飛機度瞓得好好，已經為比賽做好準備，好期待同新隊友見面，我相信自己可以幫助球會。A米係我一直鍾意嘅球隊，細細個就已經捧佢哋。」
本田亦講起另一位日本國腳，效力國際米蘭嘅長友佑都：「我同長友傾過電話，佢係我好朋友。足球係我生命，希望可以有好表現。其實，我踢咩位置都得，我識入波，又識創造機會。」A米官網同日正式宣佈本田以自由身加盟，同埋佢會着上10號球衣。雖然本田已經嚟咗，但喺今晚對阿特蘭大嘅意甲，佢只會喺看台做觀眾。星期三AC同本田會正式舉行加盟記者會，到下輪作客薩斯索羅，本田好可能上演佢嘅A米處子騷。
巴神或重投文仙尼懷抱
另外，意大利傳媒爆料，A米前鋒巴洛迪利可能會轉投加拉塔沙雷，同佢契爺文仙尼重逢。意媒指，巴神嘅經理人已經同加拉塔沙雷代表見面，傾吓轉會嘅可能性。我求大俠仲記得，巴神仲踢緊曼城嗰陣，試過同嗰陣教緊曼城嘅文仙尼喺訓練時大打出手，唔通文帥呢次唔怕畀佢契仔打多次？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange