【直擊報道】
隨着第二批白表免補地價買居屋的白居二客陸續收信，多個地區湧現睇樓潮，市場更傳有白居二客偷步入市。記者現場直擊天水圍實況，追訪來港13年、祖籍巴基斯坦的Ahmed半日狂睇10個盤，目標是200萬元的三房戶，冀農曆年前後拍板。
記者：陳家雄
昨日中午時份，記者在天水圍某代理行，已有幾組白居二客前後腳入舖問盤，雖未取證，但想做定功課，突然另一名相熟代理通風報信指：「天頌苑有兩組白居二客正睇緊樓！」其中一組客人是祖籍巴基斯坦的Ahmed帶同太太、家姐和姪女，參觀天頌苑一個交吉單位。
不想捱貴租求置業
來港13年的Ahmed從事建造工程，去年初得悉中籤白居二，滿心歡喜。他稱：「十幾年前月租3,000蚊，𠵱家要6,000蚊，租金越來越貴，能夠買樓，當然係買樓好，買咗層樓係自己嘅！」他對其他地區無興趣，只看天水圍，「我住元朗村屋十幾年，𠵱家呢區有晒交通，天水圍個區較新，環境幾好，唔似得市區咁擠逼。對小朋友來講，又有學校，好多社區設施，而且很多我承擔得到的價錢可以選擇。」
他坦言：「我聽講樓價會下跌，但我唔會等，冇人知道未來升定跌！」半天總共睇10個盤，結果睇中2個，分別是天頌苑某座高層戶及天富苑某座低層戶，實用面積同為650方呎，叫價分別260萬及210萬元。他將會日內取證，希望農曆新年前後拍板入市。
傳錄兩宗偷步入市
祥益地產蕭嘉偉表示，剛周末兩日天水圍區錄約50組白居二睇樓客，其中8組已表明，取證後就入市。富誠地產林栢榮指，黃大仙及鑽石山一帶剛周末兩日錄逾30組白居二睇樓客，較上周白居二睇樓量多逾三成。
市傳鑽石山公屋鳳德邨4座中層18室，實用面積455方呎，綠表叫價200萬元，口頭承諾以180萬元成交。大圍居屋美松苑亦錄得偷步入市個案。根據《房屋條例》，任何人或將土地轉讓或以其他方式讓予，或訂立一項關乎土地的協議，即屬違法，最高罰款50萬元及監禁一年。
白居二客湧入市，自由市場居屋業主即劈價沽。中原陳永強表示，上水居屋彩蒲苑D座高層16室，實用面積338方呎，原叫價270萬元，減價5.5%，以已補地價255萬元易手，實呎7,544元。業主2011年6月以已補地價166.5萬元買入，賺88.5萬元。
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24