本田圭佑踏入14年即刻夢想成真，正式以自由身加盟自細就追捧嘅意甲球會AC米蘭，對亞洲球迷嚟講的確頗令人振奮。呢一宗轉會風波擾攘多時，去年年尾終於塵埃落定，由A米副會長加里安尼親證其「高度重視」嘅身份。本田仲非常有志氣，要求成為A米一直懸空嘅10號波衫新主人，日本球星盡顯決心同霸氣。
雖然外形不俗嘅本田登陸意甲後，可望成為第二個中田英壽，為日本球員爭光；但不少日本球迷都未有祝福願望成真嘅本田。現時排意甲第13位嘅紅黑軍團，直情當本田係「救世主」，仲派員飛到日本將10號波衫親自送到日本中場手上，畀足誠意同面子本田。但有球迷坦言只係錢作怪，A米實情只係睇中本田可以開拓亞洲市場！最可悲係一向大和民族主義橫行嘅日本球迷都毒舌：「So what？當初香川真司去曼聯都不過如此。」暗嘲本田明踩香川，意即加盟大球會唔代表你有運行！球迷即管睇吓呢位「意甲新鮮人」會唔會「雷聲大雨點小」，步香川後塵喇。文：呂晨
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24