「費天王」費達拿（圖）喺2014年雖然力圖振作，但似乎頹勢未止，呢位首號種籽喺周日嘅布里斯班網賽男單決賽，對住澳洲老將曉域治，竟然都以盤數1:2落敗，令後者久旱逢甘露，自2010年後首次奪得男單賽事錦標。
前世界第一嘅費達拿喺2013年開始表現下滑，全年淨係贏得一個男單錦標，佢本來諗住喺2014年重新振作，換咗大頭球拍比賽，又啱啱公佈就嚟再做老豆沖喜，仲要喺布里斯班男單決賽只係對住近年受傷患困擾嘅32歲老將曉域治，諗住今次掂硬！點知佢喺周日嘅決賽表現認真麻麻，好多時都喺無壓力下犯錯，竟然連打空氣都試埋，結果就以盤數1:2輸咗畀曉域治。
曉域治4年來首稱王
不過，好彩費天王輸波冇輸風度，佢賽後就好得體咁講：「我當然希望可以捧盃，不過，曉域治今場嘅表現的確係好過我，所以恭喜佢！」至於曉域治可以喺自己地頭捧盃，仲要係自2010年以嚟再次勝出男單錦標，自然好開心。畢竟，曉域治近年成日受傷患困擾，腳趾、腳、手、臀部同背部都曾受傷，難怪佢好感慨咁講：「呢4、5年真係好難捱，我做過5次手術咁多，但亦因為咁，今次勝利對我意義好重大，我要特別多謝家人嘅支持。」
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24