港台「第36屆十大中文金曲頒獎音樂會」將會喺今個月12號喺九龍灣展貿舉行，由於今年金針獎從缺，大會就改為向羅文、張國榮、梅艷芳、陳百強（Danny）同黃家駒五位已故歌手致敬。聽講大會搵咗唔少有份量嘅歌手向五位巨星致敬，其中鄭秀文同Danny爸爸陳鵬飛會講Danny生前點滴、張學友同曾志偉講梅艷芳、鄭伊健講羅文，而陳淑芬同Beyond前經理人陳健添（Leslie）就分別講張國榮同家駒。不過，最特別都係大會搵咗Cool魔張智霖（Chilam）同容祖兒（Joey）合唱張國榮同阿梅嘅經典歌《緣份》，呢個配搭聽落都幾新鮮。
噚晚個唱失聲
噚日問番十大中文金曲大會總監馮偉棠，佢話：「Chilam除咗同Joey合唱之外，仲會唱《有誰共鳴》，Chilam好有哥哥（張國榮）神采，笑容好似哥哥。到時張敬軒都會唱《畫出彩虹》，王菀之唱《似是故人來》，而《中國好聲音》嘅吳莫愁、李代沬同張瑋亦會唱歌致敬。今次我哋場景設計係參考911紀念館概念，有好多LED幕牆播出幾位已故歌手嘅影像，以及Sammi、學友佢哋預先拍咗嘅短片，同過往悼念形式好唔同。」
此外，噚晚容祖兒喺紅館舉行第14場個唱，8點58分先至開場，之前感冒失聲嘅祖兒，唱第一首歌又再失聲，兩度唱唔到。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！