【跑馬地→銅鑼灣】陳伶俐同林敏驄離婚後，帶埋兩個仔林肯同林善改嫁新加坡隱形富豪胡嘉烈後人劉頌銘，升呢做闊太住山頂豪宅。雖然老公曾被拍到同落選港姐李影珊喺車廂激吻，有傳當時嘅伶俐獲奶奶力撐，仲催佢快啲為劉家開枝散葉，挽救咗呢段婚姻。大前晚7點幾，劉頌銘揸住架平治房車載老婆去跑馬地一銀行，伶俐一支箭落車入銀行提款，似乎已掌握屋企經濟大權，錢銀可以同老公兩份使。
賀37歲生日
至前日凌晨12點幾，剛踏入37歲生日嘅伶俐被發現喺銅鑼灣JP戲院門外，但同佢慶祝生日嘅唔止老公一個人，仲有好錫佢嘅奶奶同一位中年男士，連生日都預埋奶奶一份，睇嚟伶俐嘅得寵指數又再上升。佢哋四個人去戲院睇午夜場，當晚有《救火英雄》同《喜愛夜蒲3》上映，雖然散場時間好接近，但估計帶老人家去睇戲，應該唔會揀套近乎三級嘅激情片《夜蒲3》去睇啩！
凌晨兩點三，伶俐夫婦及奶奶一行四人由長樓梯行落嚟，因為老人家行動較緩慢，伶俐同劉頌銘都好遷就，專登放慢腳步緊隨其後。男友人先行離開，劉頌銘揸車載老婆同阿媽返屋企。
採訪、攝影：吳耀輝、李志明
戲裡戲外，話題最強，立即收睇《動戲場》:
http://hk.movies.nextmedia.com/extra/list/