老牌工業股升岡國際（485）早前宣佈，與遼寧發展商遼寧實華集團簽訂諒解備錄，將向其出售54%權益，刺激股價一度爆升42%。再有內房企業來港借殼上市，證明殼股有價有市，炒風一觸即發。要做一隻靚殼，需具備三大條件︰業務簡單、財務狀況佳及大股東持貨集中，由永利控股（876）分拆出來嘅永利地產（864），絕對符合上述要求，一旦惹來資金垂青，隨時升到你唔信。
永利地產主要從事商住物業投資，截至去年6月底止，在中港擁有35個物業。受累公平值收益大減，去年上半年盈利大減77%至3,154萬銀，雖然本港整體物業價格有見頂迹象，但租金收益卻絲毫無損，從整體收入按年有16%升幅可見一斑，核心業務兩個字講晒︰硬淨！扣除短債後，該集團有兩千多萬現金在手，財務狀況夠靚仔。大股東周氏家族現時持股接近75%，要賣殼可謂話都冇咁易，加上從事地產業務，與內房企業不謀而合，絕對係一個bonus！
現時永利地產市值只得2.8億銀，連基本殼價3億銀都未夠，地產業務變相免費奉上；再秤身家，每股NAV高達2.35元，以上周五收市價0.73元計，市賬率只得0.3倍，實在平得可憐，從任何角度睇，都絕對值得真金白銀支持。
唐牛
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24